Tong Setan

Fithrorozi
Komunitas Telinsong Budaya

BIAK itupun ngade-ngade. Baru jak bemutor detunton urang ramai la nyebut dirik kawan sitan. Aku ne la lamak juak kesitanan mun bemutor, tapi dak isak mintak tudo macam itu, ngalokkan dirik bemutor de tong setan segale. Usa kan minjam tong setan minjam tong Nek Mot lete deambus-ambuskan belau pehadal ukan nak bekawan kan setan.

Baru jak ini ne Rahamin betubat, entak ngembagai-bagaikan urang de kuran mangke la deambuskan Nek Mot. Nang banget sare dirik ne bebuat baik, uji Rahamin bang ati. Sejurus depaido urang gara-gara nulis, Rahamin nak beruba mangke tika la pelinge macam kini ade pulak ngansang-ngansangek die. Kemarik ngajak minum aik keme belis, mangke sekarang la nak ngajak bemutor de tong setan. Sangkaan nyaman.

"La min, kati. Bagik kan nulak rejeki mun dirik juak perelu kan duit." Nang urang ne juak sing pandai-pandaila muat Rahamin kebegeran. Duit, mun la tedengar kan duit dak sape-sape kan kesitanan. Rahamin ukan minggak kesitanan mun la bemutor ape agik mun ade nok ngejarkan Rahamin. La kai macam desepu belis Rahamin bemutor gara-gara ngejarkan duit tauke nak bejual tana. Belipat rude mutor, dak muat Rahamin pata arang. Kebaikan dak pata-memata. Hmm la uda itu se, tapi bekindas ngejarkan duit.

Duit setan ape duit malaikat ke Min itu ?. Jan muat bulak, setapak nok dejual to ukan tana kubor reti e ukan tana setan, gik teritong tana Tuhan. Ape agik kampong ne makai dukun malaikat ukan setara guru, dak sua barik ade tana setan bang kampong. Mun setara guru biase e setara juak kan setan tapi mun makai dukun malaikat dak ade setan bang kampong. Kitu juak kan tong setan, mun Nek Mot kesitanan neradasan Rahamin sua bangat.

Deatas surat tana detulis tana negara, terang senang ati Rahamin ngembace e. Sebile agik kan dapat merula negara mun ukan sekarang. Beh, nak ngenjual gedong pemerinta mikak tau sendirik, uji Rahamin. Nak bedagang kan pemerinta ape agik. Nak makai mudal ne. Pekare berujong, mimang kan bagas ujongapi nok dak tahan rincakan inila. Nak nyiapkan ini, nak nyiapkan itu. Tang lebe baik ngarau gawe urang la. Tang same juak ne gede duit e, piker Rahamin. Lamak juak Rahamin ngarau gawe urang. Dak banyak mudal, migang makai tekak. Sekali la ngenggertak urang, timbul nak ngangkam. La kimacam harte kuang taute.

Kenak pulak kan Kik Lebai, nyebut duit to halal. Bang dunie ne dak ade duit haram, uji Kik Lebai. Minggak Lebai dak banyak bekisa. Tika Rahamin nyurongkan tangan nak mintak restu ngencarik duit dari ngula sampa de kampong, minggak dak telambong mbab Kik Lebai kesenangan ngendengar niat Rahaimin. Pedahal mun becakapkan kan Rahamin to nak pandai-pandai ngerinci. Usa minggak halal haram tapi nak deterangkan dari ulu sampai ke iler. Ini kuang, itu dak kuang. Mun dak kitu, deterabas Rahamin.

Piker Kik Lebai, Rahamin to la pandaila bekutis, ngencarik duit halal. Sape nyebut haram. Rahamin kan nak ngemberesekan sampa. Agama pulak ngajarek berse to sebagian dari Iman, kiape ke?. Jadi nang kan dak macam-macam pikeran Kik Lebai.

Seari duak, Kik Lebai dak ngendengar urang ngume debuat Rahamin. Senang ati Kik Lebai. Urang bang kampong juak senang, Rahamin dak ngenjual kampong. Mun daan, sesat tiap ari mige-mige tana dak besurat. Mikak tau sendirik la, tana bang kampong ne dejadikan ume, idang deula jadi dak bangat perelu urang kan surat tana.

Minggak ade nok mintak bagi tana idang deambik, dak bagik kedengkut urang kan tana, tang pasti deberik asal jangan depejual-belikan. Ini, mentang-mentang pandai nyautek pemerinta, Rahamin tule gampang muat surat tana. Kini mun ade nok becakap, macam dak beduse Rahamin ngenjawab. "Sebile ikam muat tana. Tana to pun buatan Tuhan ukan buatan manusie. Usa kan tana ikam, tana negara jak kuang dejual." Kitu jawaban Rahamin tika gik rajin jadi bejual tana bang kampong. Jadi nak patut Kik Lebai senang, ngendengar Rahamin nak ngembersekan sampa.

Andangan seminggu, baru tedengar Nek Mot ngume. Rupenye puas bepintak, debantai Rahamin mindakan tong punye Nek Mot. La uda itu, sesat sekampong-kampong Nek Mot gumer-gumer, ngalokkan Rahamin. "Biak kurang ajar, dak tau dirik, dak tau malu. Maling pekakas urang." Kitula cakap Nek Mot ngalokkan Rahamin.

Minggak dak belubang belakang Rahamin decakapek Nek Mot. Nek Mot ukan dak nak becakap deabaan Rahamin. Kiape nak becakap, batang idong Rahamin jak dak tauan rimba'e. Hal macam ini, dak sampai ke bilong Kik Lebai.

Nang Rahamin kitu juak, dak kuang ngeliat Nek Mot naro pekakas baru. Ukan baru mun dak se, tapi jarang-jarang Nek Mot naro tong gede macam kitu. Jadi Rahamin piker, itupun urang sala ngelepaskan. Mungkin nak merik die tapi sala ngentokkan. Idang ape Nek Mot tong gede kitu, pasti sala. Kitula sebit e, ngape sampai Rahamin teputik-putik kan pekakas urang.

La tebiat manusie, ngukor urang dari barang. Sampai-sampai ape nok deutak Nek Mot dak depikirek Rahamin. Mun dak nang iye, untuk ape Nek Mot naro tong gede macam kitu. Ngisik padasan jak belau senga-senge mangke nak isik aik bang tong. Sikok agik, mun dak ngukor dari barang kan dari harte, manusie bang kampong ne kuat ngukor derajat manusise dari duit. Pekare duit to dedapat dari care halal, care haram dak jadi urusan. Nok penting duit banyak, la kuang ngenjangak. Itu ajak nok depikerek.

Cakap Nek Mot dak sampai ke bilong Lebai karne Kik Lebai kuat nundaan gawe Rahamin de ume. Rupenye selamak rajin muat tong sampa, Rahamin dak isak nempo kampong. Kik Lebai kitu juak. Jadi la kimacam duak sekawan, beunda-undaan. Tang baru inila Kik Lebai nak ngendekat. Kitu juak kan Rahamin. Reti e Rahamin ne la tubat. Ukan bagik. Kik Lebai ne rupenye raga curige nak kan sebenare ke Rahamin ne begawe. "Kik ini pun idang nulongek pemerinta, biar urang muang sampa sembarang," uji Rahamin. Bapangggaai. Makin tamba suke Kik Lebai kan Rahamin.